|
Upang alamin ang totoong sitwasyon ng daloy ng trapiko at kung
talagang epektibo nga ang ipinatutupad na Traffic Free City
Program sa Lungsod ng Calapan, personal na umikot sa kabayanan ng
lungsod si City Mayor Doy C. Leachon sakay ng isang tricycle noong
ika-15 ng Oktubre.
“Gusto kong ako mismo ang makakita at makaranas ng aktuwal na
daloy ng trapiko upang malaman ko kung ano ang mas nararapat na
gawin sa pagsasaayos nito.” – banggit ni Mayor Doy. Ayon sa kanya,
bagama’t may mangilan-ngilan na mga nagpaparating ng kanilang
hindi pakakuntento sa mga pagbabagob, marami din naman aniya ang
pumupuri sa bagong sistema sa trapiko na kanyang ipinatutupad sa
pamamagitan ng Traffic Free City Program. Ayon sa kanyang mga
nakakausap na mga konsernadong indibidwal, hindi lamang ng mga
taga-Calapan ngunit pati ng mga taga-karatig bayan, higit na
maluwag ngayon sa JP Rizal Street at mas malinis tingnan kumpara
noong mga nakaraang taon. Ikinatuwa naman ito ng Punong Lungsod
kung kaya’t lalong nadagdagan ang kanyang determinasyon na
pag-igihin ang pagpapatupad ng programa sa trapiko.
Oras de peligro ng umikot si Mayor Doy sa kabayanan kung kaya’t
kitang-kita niya ang tunay na sitwasyon ng daloy ng trapiko. Agad
naman siyang nakipag-ugnayan sa Aksyon Agad Traffic Management
Unit na pinangungunahan ni G. Nelson Aboboto ukol sa kanyang mga
obserbasyon. Ani G. Aboboto, patuloy ang kanilang isinasagawang
monitoring sa mga lansangan upang makita kung ano pa ang dapat
ayusin o baguhin upang lalong maging epektibo ang programang
ipinatutupad. Nais din ng pamunuang Leachon na kung aamiyendahan
ang City Ordinance No. 96-08 ukol sa batas trapiko sa Calapan,
masiguro muna kung ano ang mga dapat gawing pagbabago na angkop sa
mga pangangailangan at kasalukuyang takbo ng buhay ng mga Calapeno.
Nais ding iparating ni Mayor Doy sa mga mamamayan ng lungsod na
bukas ang kanyang tanggapan sa anumang suhestiyon o komento ukol
sa mga programang kanyang ipinatutupad. Batid aniya na hindi
kakayanin mag-isa ng Pamahalaang Lungsod na gawing matagumpay ang
implementasyon ng mga ito kung hindi makikipagtulungan ang mismong
mga mamamayan ng syudad. |
