|
Sa kagustuhang mabawasan at tuluyang maiwasan ang mga aksidente sa
kalsada gamit ang mga motorsiklo, pagtitibayin muli ng Pamahalaang
Lungsod ng Calapan sa pamamagitan ng City Public Safety Department
and Philippine National Police-Calapan City ang regulasyon sa
paggamit ng full-faced helmet para sa mga drayber at pasahero ng
mga motorsiklo.
Ayon kay PSD Chief Nelson Aboboto, muling paiigtingin ang
Resolution No. 241, City Ordinance No. 9 o may titulong “An
Ordinace Regulating The Use of Motorcycles in the City of Calapan
and for this purpose, Modifying Certain Provisions of Resolution
No. 308 – Ordinance No. 96-08” bilang sagot sa nakakaalarmang
bilang ng aksidenteng sangkot ang mga drayber ng motorsiklo na
hindi nagsusuot ng full-faced helmet.
Ayon kay Calapan- PNP chief Maj. Bonard Briton, may tala sila ng
dalawang kaso ng aksidente kada araw na natatanggap dahil lamang
sa hindi pagsusuot ng helmet.
Ayon sa ordinansa, inaasahan ang palagiang paggamit ng helmet
para sa mga drayber ng motorsiklo at pasahero. Ipinaalala din ang
restrisyon sa bilang ng pasahero kung saan bawat motorsiklo ay
pinapayagan lamang na magsakay ng isang pasahero. At mga batang
limang taon pataas lamang ang hinahayaang sumakay sa motorsiklo
bilang pasahero.
Alinman sa drayber at pasahero na susuway sa probisyon ay
magmumulta ng P500.00 para sa unang paglabag, P1,000.00 para sa
pangalawang paglabag, at P2,000.00 para sa pangatlo at susunod
pang opensa. At kung hindi makakapagbayad ang lumabag, madsasagawa
siya ng community service, 2 araw para sa unang opensa, 4 araw
para sa pangalawang opensa, at 1 linggo para sa ikatlong opensa.
Nakatakdang ipatupad ang ‘helmet ordinance’ sa Nobyembre 5.
Ayon kay naman City Mayor Doy Leachon, ang ordinansang ito ay para
sa interes ng kaayusan, kaligtasan at seguridad ng mga residente ng lungsod. |
