|
P100,000 halaga ng bagong
uniporme ng mga tricycle drivers kaloob ni Mayor Doy
released: 9/26/2007
source: CIO
Bilang dagdag na ayuda at
inspirasyon upang lalong makiisa ang mga tricycle drivers sa
ipatutupad na “Aksyon Agad- Traffic Free City” sa Calapan,
magkakaloob ng halagang P 100,000.00 si City Mayor Doy C. Leachon
para sa bagong uniporme ng mga naturang drivers na susuotin mula
Oktubre 8.
Ang nasabing inisyatiba ay naisip na
ipagkaloob ng Punong Lungsod sapagkat alam niya na kakambal ng mga
hinahangad niyang pagbabago at pag-unlad sa lungsod ay ang
pagbibigay din ng tulong sa mga mamamayan na salat sa kabuhayan na
maaapektuhan ng mga pagbabago. Ang halaga ng bawat uniporme ay
ibabawas sa kabuoang halaga ng renewal ng mga prangkisa ng
mga tricycle na kanilang minamaneho.
Maliban sa nasabing ayuda, patuloy
din ang isinasagawang paghahanda ng Public Safety Department (PSD)
na pinamumunuan ni Mr. Nelson Aboboto para sa “Traffic Free City”.
Noong nakaraang linggo ay sinimulan na ang paghahanda at ang
malawakang information dissemination campaign sa lungsod
upang ipaalam ang mga inaasahang pagbabago sa daloy ng trapiko.
Isinagawa na ang 10-Minute Parking Policy sa kahabaan ng JP Rizal
Street at kasalukuyang ipinatutupad na rin ang No Left Turn
Policy.
Sa darating na ika-1 ng Oktubre,
gaganapin na ang dry-run ng lahat ng mga pagbabago na nais
ipatupad ukol sa daloy ng trapiko at sa ika-8 ng Oktubre ay pormal
nang ilulunsad ang programa sa okasyon ng unang 100 araw ng
pagiging Punong Lungsod ni Mayor Leachon. |
