|
Ambulant vendors sa San
Agustin St.,
bibigyan na ng sariling
pwesto
released: 9/26/2007
source: CIO
Bibigyan na ng sariling pwesto ang
humigit kumulang sa 300 na ambulant vendors mula sa San Agustin
St. ng Pamilihang Lungsod ng Calapan upang masawata ang
lumulubhang kondisyon ng trapiko alinsunod sa ipapatupad na
programang Orderly Public Market at Traffic- Free City. Layunin
rin nito na tuluyan nang maiwasan ang mga pakalat-kalat na
manininda sa mga lansangan ng nabanggit na lugar. Kasabay nito,
puspusan na ang isinasagawang plano ng Pamahalaang Lungsod sa
pangunguna ni City Mayor Doy C. Leachon para sa mabilisang
paglilipat sa mga naturang manininda. Base sa proyektong
ipatutupad, sila ay ililipat sa bakanteng espasyo sa may kahabaan
ng Aurora Blvd. at maaaring pagkalooban ng pwesto na may sukat na
1 metro kwadrado kada ambulant vendor.
Dalawang buwang pinag-aralan ni City
Trade and Industry Officer at bagong talagang Market Administrator
Joey Benter ang sistema ng pamamaraan sa loob at labas ng palengke.
Dito, nakita niya ang mga problemang dapat agad ma-solusyonan at
bigyan ng pansin. Kasama sa kanyang isinagawang mga istratehiya ng
pag-aaral ang serye ng konsultasyon sa mga asosasyon ng manininda
sa palengke upang masiguro na magiging epektibo ang
iminumungkahing action plan base na rin sa partisipasyon na
ipinakita ng iba’t ibang grupo na higit na makikinabang sa mga
darating na pagbabago.
Kaakibat ng mapanghamong
responsibilidad na iniatang ng alkalde kay Benter ang pagnanais na
mailagay sa ayos ang buong palengke at upang higit na mapasigla sa
merkado ang nasabing pamilihan. Nilinaw ni Benter na magiging
istrikto sila sa pagpapatupad ng mga karampatang ordinansa at
sisiguruhin na paiiralin ang mga programang nilalayon ng Aksyon
Agad ng Pamunuang Leachon.
|
