Batid ng Punong Lungsod na malaking income generating project ang nasabing pamilihan. Ngunit malaking hadlang upang mas mapasigla sa merkado ang pamilihan kung mananatili ito sa kanyang kasalukuyang kondisyon. Kaugnay nito, minarapat ni G. Benter na magsagawa ng pag-aaral upang makabuo ng mga istratehiyang maglalagay sa pangkalahatang kaayusan ng pamilihan.

Batay sa isinagawa nilang paglilibot sa buong kabuuan ng palengke, nakita niya na bukod sa ilang rehabilitasyon pang-imprastraktura kinakailangang magkaroon ng maayos na pamamahala. Dagdag pa niya, kailangang mabigyang solusyon ang lumalaking bilang ng mga ambulant vendors, mabigyan ng ligal na aksyon ang mga delinquent stallholders, ang lumalalang trapiko, kawalan ng Market Code at ang problema sa kalinisan. Nagkaroon rin ng serye ng pagpupulong sa pagitan ng Pamahalaang Lungsod at ng mga samahang manininda sa pamilihan upang maipakita ang hangaring mabigyan ng tugon ang mga idinudulog at nakitang problema.

Matapos ang mga nasabing pag-uusap, maayos na nailatag ang mga pagbabagong paiiralin sa loob at labas ng pamilihan. Bagamat tahasan itong ipatutupad, ito naman ang mga pagbabagong sasagot sa kasalukuyang kalagayan ng palengke.